Konda Surekha Rakhi 28: రేవంత్‌కు రాఖీ.. కొండా సురేఖ వ్యవహారంలో కొత్త చర్చ!
Konda Surekha Rakhi 28: ఆత్మీయ కలయిక వెనుక రాజకీయ కోణమా?
తెలంగాణ కాంగ్రెస్‌లో గత కొన్ని రోజులుగా రగులుతున్న కొండా సురేఖ వ్యవహారం రాజకీయ వేడి. ముఖ్యమంత్రి రేవంత్ రెడ్డిపై ఆమె కుమార్తె కొండా సుస్మిత చేసిన వ్యాఖ్యలు వివాదానికి దారితీయడంతో.. ఆ వ్యవహారం చివరకు పార్టీ క్రమశిక్షణ కమిటీ వరకు వెళ్లింది. సురేఖకు షోకాజ్ నోటీసు కూడా జారీ అయింది.
సురేఖ మాత్రం తన కుమార్తె వ్యాఖ్యలతో తనకు సంబంధం లేదని, అది ఆమె వ్యక్తిగత వ్యవహారమని వివరణ ఇచ్చారు. అయినప్పటికీ వివాదం అక్కడితో ఆగలేదు. పార్టీ నేతల్లో కొందరు ఆమెపై చర్యలు తీసుకోవాలని డిమాండ్ చేయడం, క్రమశిక్షణ కమిటీ కూడా చర్యలకు సిఫారసు చేయడంతో వ్యవహారం మరింత సీరియస్‌గా మారింది.
ఇంతలో రాఖీ వచ్చింది..ఆగస్టు 28న రాఖీ పండుగ సందర్భంగా కొండా సురేఖ ముఖ్యమంత్రి రేవంత్‌రెడ్డి నివాసానికి వెళ్లారు. ఆయనకు రాఖీ కట్టారు. మరో మంత్రి సీతక్క కూడా సీఎంకు రాఖీ కట్టారు. ఇక్కడే ఈ వ్యవహారం రాజకీయంగా ఆసక్తికరంగా మారింది.
ఎందుకంటే ఇది సాధారణ రాఖీ పండుగ సందర్భం కాదు. ఒకవైపు పార్టీ క్రమశిక్షణ వ్యవహారం నడుస్తుండగా.. మరో వైపు సురేఖ స్వయంగా సీఎంను కలిసి రాఖీ కట్టడం సహజంగానే రాజకీయ చర్చకు దారి తీసింది.
కొండా సురేఖ చెప్పిన వివరాల ప్రకారం, రేవంత్‌రెడ్డికి ఆమె గత మూడేళ్లుగా రాఖీ కడుతున్నారు. ఈసారి కూడా అదే సంప్రదాయాన్ని కొనసాగించారు. రేవంత్‌రెడ్డితో పాటు ఆయన మనవడికి, అల్లుడికి కూడా బంగారు రాఖీలు కట్టినట్లు ఆమె తెలిపారు. అంటే ఈ సంప్రదాయం కొత్తగా రాజకీయ ఎత్తుగడ కాదని పరోక్షంగా చెప్పడానికి ప్రయత్నించారు.. మరి రాజకీయాల గురించి మాట్లాడారా? ఇదే అసలు ఆసక్తికరమైన విషయం. రాఖీ కట్టిన తర్వాత సురేఖను మీడియా రాజకీయ వివాదంపై ప్రశ్నించింది. అయితే పండుగ రోజున రాజకీయాలు మాట్లాడనని ఆమె స్పష్టం చేశారు.
అక్కడితో ఊహాగానాలు మాత్రం ఆగలేదు.ఎందుకంటే కొద్దిరోజులుగా సురేఖ ముఖ్యమంత్రి రేవంత్ రెడ్డి తో నేరుగా మాట్లాడే అవకాశం కోసం ప్రయత్నాలు జరుగుతున్నాయన్న ప్రచారం ఉంది. రాఖీ పండుగ అందుకు సహజమైన సందర్భాన్ని కల్పించింది. సాధారణ రాజకీయ భేటీకి ఒక రాజకీయ అర్థం ఉండొచ్చు. కానీ రాఖీ కోసం కలవడం మాత్రం ఆత్మీయమైన సందర్భంగా కనిపిస్తుంది.
రాఖీతో సమస్య పరిష్కారమైందా?
ఇక్కడే అసలు ట్విస్ట్ ఉంది. రేవంత్‌రెడ్డికి రాఖీ కట్టారు. ఇద్దరూ కలిశారు. పండుగ వాతావరణంలో ఆత్మీయత కనిపించింది. అంత మాత్రాన కొండా సురేఖపై పార్టీ క్రమశిక్షణ చర్యల వ్యవహారం ముగిసిపోయిందని మాత్రం ఇప్పుడే చెప్పలేం. ఎందుకంటే ఈ వ్యవహారం ఇప్పటికే పార్టీ అంతర్గత క్రమశిక్షణ ప్రక్రియలోకి వెళ్లింది. రాష్ట్ర స్థాయి కమిటీ సిఫారసుల తర్వాత తుది నిర్ణయం ఏఐసీసీ పరిధిలో ఉందని పార్టీ వర్గాల నుంచి స్పష్టమైన సంకేతాలు వచ్చాయి. రేవంత్‌రెడ్డి కూడా ఈ అంశంపై తుది నిర్ణయం పార్టీ అధిష్ఠానానిదేనని పేర్కొన్నారు. అంటే…సంప్రదాయం సంప్రదాయమే.
పార్టీ క్రమశిక్షణ క్రమశిక్షణే. ఈ రెండింటినీ ఒకే తాటిపైకి తీసుకురావడం అంత సులభం కాదు.
సురేఖకు మాత్రం మంచి అవకాశం..రాజకీయ కోణంలో చూస్తే మాత్రం రాఖీ సురేఖకు ఒక మంచి అవకాశం కల్పించిందని చెప్పొచ్చు. ఇటీవల నెలకొన్న వివాదం నేపథ్యంలో సీఎంను కలవడం ఒక విషయం. అదే రాఖీ పండుగ సందర్భంగా ఆత్మీయంగా కలవడం మరో విషయం.
అందులో ఆమె తన పరిస్థితిని వివరించడానికి అవకాశం దొరికిందా? ఏమైనా హామీ లభించిందా? భవిష్యత్తుపై ఏదైనా చర్చ జరిగిందా? ఇవన్నీ ప్రస్తుతానికి ప్రశ్నలే. ఎందుకంటే సురేఖ స్వయంగా కూడా ఆ రోజు రాజకీయాల గురించి మాట్లాడలేదని చెప్పారు. మరి ఈ రాఖీ ఏం చెబుతోంది?
రాఖీ కట్టడం వల్ల పార్టీ క్రమశిక్షణ వ్యవహారం కూడా సమసిపోతుందని అనుకోవడం తొందరపాటే.
రాఖీతో ఆ రోజు రాజకీయ వాతావరణం ఆహ్లాదంగా, ఆత్మీయంగా కనిపించి ఉండవచ్చు.. కానీ రాజకీయ వేడి పూర్తిగా తగ్గిందా? దానికి సమాధానం మాత్రం రాబోయే రోజుల్లోనే తెలుస్తుంది. ఎందుకంటే అసలు కథ రాఖీతో ముగియలేదు…అసలు కథ ఇప్పుడు మొదలైందేమో!
click here to read ఎన్నికలు లేకున్నా తెలంగాణలో ఎన్నికల వేడి..
Konda Surekha Rakhi 28 Konda Surekha Rakhi 28 Konda Surekha Rakhi 28
