Yemen Spider-Man Death: విన్యాసం చేస్తూ జారిపడి.. ‘రియల్ లైఫ్ స్పైడర్మ్యాన్’ విషాదాంతం ( video)
Yemen Spider-Man Death | అగ్నిపర్వత బిలంలో పడిపోయిన అల్-ఖాఖా అంతర్
Yemen Spider-Man Death | మృతదేహం కోసం కొనసాగుతున్న సహాయక చర్యలు
ఎలాంటి భద్రతా పరికరాలు లేకుండా నిటారైన కొండలు, ప్రమాదకరమైన రాతి వాలులను చాకచక్యంగా ఎక్కుతూ గుర్తింపు పొందిన యెమెన్ యువ సాహసికుడు అల్-ఖాఖా బిన్ అంతర్ విషాదాంతానికి గురయ్యారు. ‘యెమెన్ స్పైడర్మ్యాన్’గా సోషల్ మీడియాలో పేరొందిన ఆయన.. అగ్నిపర్వత బిలంలో విన్యాసాలు చేస్తుండగా అదుపుతప్పి కిందపడిపోయారు.
యెమెన్లోని అల్-ధాలియా గవర్నరేట్ పరిధిలో ఉన్న హరదత్ దామత్ అగ్నిపర్వత బిలం వద్ద శుక్రవారం ఈ ఘటన చోటుచేసుకున్నట్లు స్థానిక కథనాలు వెల్లడించాయి. బిలంలోని నిటారైన రాతి గోడలను ఎక్కుతున్న సమయంలో అల్-ఖాఖా అకస్మాత్తుగా పట్టుకోల్పోయి లోతైన ప్రదేశంలోకి పడిపోయినట్లు సమాచారం.
Yemen Spider-Man Death | క్షణాల్లో జరిగిన ప్రమాదం
అల్-ఖాఖా విన్యాసాలను అక్కడే ఉన్న కొందరు తమ సెల్ఫోన్లలో చిత్రీకరిస్తున్నారు. ఆయన రాతి వాలుపై కదులుతున్న సమయంలో ఒక్కసారిగా కాలు జారి కిందకు పడిపోయిన దృశ్యాలు సామాజిక మాధ్యమాల్లో ప్రచారంలోకి వచ్చాయి. ఈ ఘటనను ప్రత్యక్షంగా చూసినవారు తీవ్ర దిగ్భ్రాంతికి గురయ్యారు.
అగ్నిపర్వత బిలం అడుగు భాగంలో వేడి సల్ఫర్ నీరు ఉండటం, ప్రాంతమంతా నిటారైన రాళ్లతో అత్యంత ప్రమాదకరంగా ఉండటంతో సహాయక చర్యలకు తీవ్ర ఆటంకాలు ఎదురవుతున్నట్లు సమాచారం. ఘటనపై సమాచారం అందుకున్న పౌర రక్షణ బృందాలు పరిసర ప్రాంతాల్లో గాలింపు చేపట్టాయి. ప్రత్యేక డైవింగ్, జల సహాయక బృందాలను కూడా రంగంలోకి దించినట్లు స్థానిక మీడియా పేర్కొంది.
Yemen Spider-Man Death | మృతదేహం కోసం గాలింపు
కఠినమైన భౌగోళిక పరిస్థితులు, బిలంలోని వేడి నీరు, విషవాయువుల ప్రమాదం కారణంగా సహాయక సిబ్బంది అడుగు భాగానికి చేరుకోవడం క్లిష్టంగా మారింది. అందుబాటులో ఉన్న తాజా సమాచారం ప్రకారం అల్-ఖాఖా మృతదేహాన్ని వెలికితీసేందుకు గాలింపు చర్యలు కొనసాగుతున్నాయి. అయితే కొన్ని సామాజిక మాధ్యమాల కథనాల్లో మృతదేహాన్ని వెలికితీసినట్లు ప్రచారం జరుగుతోంది. దీనిపై అధికారికంగా స్పష్టమైన సమాచారం వెలువడాల్సి ఉంది.
Yemen Spider-Man Death | విన్యాసాలతో సోషల్ మీడియా గుర్తింపు
అల్-ఖాఖా గత కొన్నేళ్లుగా దామత్ ప్రాంతంలోని ప్రమాదకరమైన కొండలు, అగ్నిపర్వత నిర్మాణాలను ఎలాంటి భద్రతా పరికరాలు లేకుండానే ఎక్కుతూ వీడియోలు రూపొందించేవారు. నిటారైన రాతి గోడలపై వేగంగా కదిలే ఆయన నైపుణ్యాన్ని చూసిన నెటిజన్లు ‘యెమెన్ స్పైడర్మ్యాన్’గా పిలవడం ప్రారంభించారు.
ఆయన సాహస విన్యాసాలకు సామాజిక మాధ్యమాల్లో వేలాది మంది అభిమానులు ఉన్నారు. అయితే సరైన రక్షణ పరికరాలు లేకుండా చేసే ఇలాంటి ప్రమాదకర విన్యాసాలు ప్రాణాంతకంగా మారవచ్చని తాజా ఘటన మరోసారి హెచ్చరిస్తోంది. అల్-ఖాఖా మృతిపై ఆయన అభిమానులు, స్థానిక ప్రజలు తీవ్ర విచారం వ్యక్తం చేస్తున్నారు.
click here to read more: ఆటో డ్రైవర్గా సీఎం భార్య.. వైరల్ అవుతున్న వీడియో!
