ఎబోలా మళ్లీ హెచ్చరిస్తోంది.. కరోనా తర్వాత ప్రపంచానికి మరో ఆరోగ్య అలారం

ప్రపంచాన్ని కలవరపెడుతున్న ఎబోలా పేరు

ఎబోలా…..
ఇప్పుడు ప్రపంచాన్ని వణికిస్తోన్న ఒకేఒక్క పదం.
అప్పట్లో కరోనా ఉనికి కనిపించగానే అనుకున్నట్టుగానే ఇప్పుడూ ప్రపంచ దేశాలు అనుకుంటున్నాయి… “ఎక్కడో ఆఫ్రికాలో మొదలైన ఎబోలా మనదాకా వస్తుందా?” అని.
కానీ, వైరస్‌ల వ్యాప్తికి ప్రపంచ దేశాల సరిహద్దులతో సంబంధం లేదు. గాలి కన్నా వేగంగా ప్రయాణించి ప్రపంచాన్నంతా చుట్టేస్తాయి. వాటికి మానవులో, మరో జీవులో వాహకాలవుతాయి. ఇప్పుడు ఎవ్వరూ ఎబోలా గురించి ఉదాసీనంగా ఉండవద్దని ప్రమాద సంకేతాలు కనిపిస్తున్నాయి. ప్రపంచవ్యాప్తంగా ఏదో ఒక దేశంలో, ఎక్కడో ఒక చోట ఎబోలా కలకలం వినిపిస్తూనే ఉంది. కాంగో, ఉగాండా ప్రాంతాల్లో నమోదవుతున్న ఎబోలా కేసులు ప్రపంచ ఆరోగ్య సంస్థలు, మీడియా దృష్టిని ఆకర్షిస్తున్నాయి.

కరోనా మహమ్మారి విజృంభణ, విలయ తాండవం తర్వాత తర్వాత ప్రపంచం ఒక గుణపాఠం నేర్చుకుందని అనుకున్నాం. కానీ కాలం గడిచే కొద్దీ ఆ జ్ఞాపకాలు కూడా మసక బారి, మరుగున పడిపోయాయి. ఒకప్పుడు మాస్కులు, శానిటైజర్లు, లాక్‌ డౌన్లు మన దైనందిన జీవితంలో అత్యవసర భాగమైతే, ఇప్పుడు అవన్నీ గతం. అయితే ప్రకృతి మాత్రం తన హెచ్చరికలను ఆపలేదు. ఎప్పటికప్పుడు కొత్త రూపాల్లో, కొత్త ప్రాంతాల్లో వైరస్‌లు మళ్లీ మళ్లీ తలెత్తుతూనే ఉన్నాయి.

ఎబోలా పేరు వినగానే వైద్య ప్రపంచం ఎందుకు అప్రమత్తమవుతుందో తెలుసుకోవాలి. ఇది కేవలం మరో వైరస్ కాదు. ఒకసారి వ్యాప్తి ప్రారంభమైతే వేగంగా ప్రాణాలను బలి తీసుకునే ప్రమాదకర అంటువ్యాధిగా దీనికి చరిత్ర ఉంది. అందుకే ఆఫ్రికాలో నమోదవుతున్న ప్రతి కేసు ప్రపంచ ఆరోగ్య వ్యవస్థకు ఒక ప్రమాద ఘంటిక లా వినిపిస్తోంది. అక్కడి ఆసుపత్రుల్లో నమోదైన సంఖ్యలు కేవలం గణాంకాలు కావు. వాటి వెనుక ఆయా బాధిత కుటుంబాల ఆందోళన, అక్కడి సమాజం ఎదుర్కొంటున్న భయాందోళనలు, ప్రభుత్వాల నిరంతర అప్రమత్తత దాగి ఉన్నాయి.

నిజానికి ప్రపంచం ఇప్పుడు గతంలో కంటే మరింత చేరువైంది. దూరాలు తగ్గాయి..సరిహద్దులు చెరిగిపోయాయి. ఒక ఖండం నుంచి మరో ఖండానికి వెళ్లడానికి రోజులు కాదు, గంటలే చాలు. ఈ అనుసంధానమే అభివృద్ధికి సంకేతం అయినప్పటికీ, అంటువ్యాధుల విషయంలో ఇదే పెద్ద సవాలుగా మారుతోంది. అందుకే ప్రపంచ ఆరోగ్య సంస్థలు ప్రతి అనుమానాస్పద కేసును నిశితంగా పరిశీలిస్తున్నాయి.

అయితే భయపడటం కంటే అప్రమత్తంగా ఉండటమే ఇప్పుడు అవసరం. కరోనా మనకు నేర్పిన అతిపెద్ద పాఠం అదే. వైరస్ ఎక్కడ పుడుతుందన్నది కాదు, దానిని ఎంత వేగంగా గుర్తించి నియంత్రిస్తామన్నదే కీలకం. ఎబోలా వార్తలు ప్రస్తుతం సుదూర ఆఫ్రికా అడవుల నుంచి వినిపిస్తున్నా… ఆ ప్రతిధ్వని ప్రపంచమంతా వినిపిస్తోంది. అందుకే ఈసారి ప్రపంచం కేవలం చూస్తూ ఉండకుండా, ముందుగానే సిద్ధమవుతోంది. ఎందుకంటే మహమ్మారుల చరిత్రలో నిర్లక్ష్యానికి చెల్లించాల్సిన మూల్యం ఎంత భారమో మానవాళికి ఇప్పటికే తెలుసు.