తెలంగాణ అంటే మేమే..!
ఆవిర్భావ దినోత్సవం కంటే రాజకీయ స్వామ్య పోరే ఎక్కువగా కనిపించిందా?
తెలంగాణకు అన్నీ మేమే…
కానే కాదు… తెలంగాణ అంటే మేమే…
అస్సలు కాదు… తెలంగాణలో, తెలంగాణతో మేమే…
ఈసారి తెలంగాణ ఆవిర్భావ దినోత్సవ వేడుకలను చూస్తుంటే ప్రజలకు వినిపించిన అసలు సందేశం ఇదే అనిపించింది. రాష్ట్రం ఏర్పడి పన్నెండేళ్లు దాటినా, తెలంగాణ ఇంకా రాజకీయ పార్టీల మధ్య స్వామ్య పోరుకు కేంద్రబిందువుగానే ఉందేమో అనిపించే పరిస్థితి కనిపించింది.
ఒకవైపు కాంగ్రెస్ తెలంగాణను ఇచ్చింది తామేనని, రాష్ట్ర అభివృద్ధికి ఇప్పుడు కూడా తామే కట్టుబడి ఉన్నామని చెప్పుకుంది. తెలంగాణ రాష్ట్రం ఇచ్చిన చారిత్రక నిర్ణయం కాంగ్రెస్దేనని, ఇప్పుడు ఆ రాష్ట్రాన్ని అభివృద్ధి పథంలో నడిపించే బాధ్యత కూడా తమదేనని ప్రజలకు గుర్తు చేయడానికి ప్రయత్నించింది.
మరోవైపు బీఆర్ఎస్ మాత్రం తెలంగాణ వచ్చిందంటే అది ఉద్యమ ఫలితమేనని, ఆ ఉద్యమాన్ని నడిపింది తామేనని గుర్తు చేసింది. ఉద్యమ త్యాగాలు, అమరవీరులు, కేసీఆర్ నాయకత్వం లేకపోతే తెలంగాణ సాధ్యమయ్యేదే కాదని మరోసారి ప్రజల ముందుకు తీసుకువచ్చింది. తెలంగాణ ఆత్మను కాపాడేది తామేనని చెప్పే ప్రయత్నం చేసింది.
ఇక బీజేపీ వెర్షన్ మరోలా ఉంది. పార్లమెంట్లో తెలంగాణ బిల్లుకు మద్దతు ఇచ్చింది తామేనని, జాతీయ స్థాయిలో తెలంగాణ అభివృద్ధికి కేంద్రం పెద్దపీట వేస్తోందని చెప్పుకుంది. రాష్ట్రంలో నిజమైన ప్రత్యామ్నాయం తామేనని ప్రజలకు వివరించే ప్రయత్నం చేసింది.
తెలంగాణ ఉద్యమ సమయంలో పెద్దగా కనిపించని మరికొన్ని పార్టీలు, సంస్థలు కూడా ఈసారి ఆవిర్భావ వేడుకల్లో హాజరై తెలంగాణపై తమకున్న ప్రేమను చాటుకోవడానికి ప్రయత్నించాయి. ఇన్నాళ్లు ముసుగు తన్ని పడుకున్నట్టుగా కనిపించిన నాయకులు సైతం ఒక్కసారిగా తెలంగాణ పరిరక్షకులుగా అవతరించి, “తెలంగాణను కాపాడతాం” అంటూ ఎలుగెత్తి అరవడం విశేషం.
అయితే ఇక్కడే ఒక ఆసక్తికరమైన ప్రశ్న తలెత్తుతోంది. తెలంగాణను ఎవరి నుంచి కాపాడాలి? ఎలా కాపాడాలి? రాష్ట్రం ఏర్పడి పన్నెండేళ్లు పూర్తయిన తర్వాత కూడా ఇంకా “తెలంగాణ ప్రమాదంలో ఉంది” అనే రాజకీయ వాదన ఎందుకు అవసరమవుతోంది? తెలంగాణ ప్రజలే పాలిస్తున్న రాష్ట్రాన్ని తెలంగాణ ప్రజల నుంచే కాపాడాలా? లేక రాజకీయ ప్రత్యర్థుల నుంచి కాపాడాలా?
ఆవిర్భావ దినోత్సవం అంటే రాష్ట్రం సాధించిన విజయాలను గుర్తు చేసుకునే రోజు. భవిష్యత్ లక్ష్యాలను చర్చించే సందర్భం. కానీ ఈసారి చాలా వేదికలపై కనిపించింది మాత్రం తెలంగాణ చరిత్ర కంటే రాజకీయ క్రెడిట్ కోసం పోటీ. తెలంగాణ కోసం ఎవరు ఎక్కువ చేశారనే వాదన.
అంతిమంగా చూస్తే… తెలంగాణ ఏర్పడిందా? అవును. తెలంగాణ ప్రజల ఆకాంక్ష నెరవేరిందా? అవును. మరి ఇంకా ప్రతి ఏడాది తెలంగాణపై యాజమాన్య హక్కుల కోసం ఎందుకీ పోటీ? బహుశా తెలంగాణ ప్రజల మనసుల్లో తమ స్థానం నిలబెట్టుకోవాలనే రాజకీయ ఆతృతే దీనికి కారణమేమో.
అందుకే ఈ ఆవిర్భావ వేడుకలు ఒక ప్రశ్నను మళ్లీ ముందుకు తెచ్చాయి…
తెలంగాణ ఎవరిది?
ఒక పార్టీదా? ఒక నాయకుడిదా? ఒక ఉద్యమానిదా?
కాదేమో… తెలంగాణ చివరికి తెలంగాణ ప్రజలదే.
మిగతా వారంతా ఆ చరిత్రలో తమ పాత్రను గుర్తు చేసుకునే వారే.
